ठाणे जिल्हाधिकाऱ्यांकडून निवडणूक पार्श्वभूमीवर मद्यविक्री बंदीचे आदेश नियमभंग करणाऱ्यांवर कडक कारवाई

 

ठाणे,दि.02(जिमाका) :-  महाराष्ट्र राज्य निवडणूक आयोगाच्या निर्देशांनुसार ठाणे जिल्ह्यातील अंबरनाथ नगरपरिषद (वर्ग-अ) व कुळगाव-बदलापूर नगरपरिषद (वर्ग-अ) येथील सार्वत्रिक निवडणुकीदरम्यान मद्यविक्री व वितरणावर पूर्ण बंदी लागू करण्यात आली आहे. मतदानपूर्व 48 तास आणि मतमोजणी दिवशी ‘ड्राय डे’ लागू राहणार आहे. असे आदेश जिल्हाधिकारी तथा जिल्हा दंडाधिकारी डॉ. श्रीकृष्ण पांचाळ यांनी जारी केले आहेत.

निवडणूक आयोगाने 02 डिसेंबर 2025 रोजी मतदान व 03 डिसेंबर 2025 रोजी मतमोजणी जाहीर केली आहे. त्यानुसार मद्यविक्री केंद्रे, दुकानं, बार, रेस्टॉरंट्स, तसेच परवाना प्राप्त मद्यविक्री ठिकाणे निर्दिष्ट कालावधीत पूर्णपणे बंद राहतील. दि. 01.12.2025 मतदानाच्या पूर्वसंध्येचा पूर्ण दिवस, दि. 02.12.2025 मतदानाचा दिवस, दि. 03.12.2025 मतमोजणी प्रक्रिया पूर्ण होईपर्यंत मद्यविक्री पुर्णपणे बंदराहील. राज्य निवडणूक आयोगाचे निर्देश व उपरोक्त देशी/विदेशी व इतर नियमावलीतील तरतुदी विचारात घेता मी डॉ. श्रीकृष्ण पांचाळ, जिल्हाधिकारी तथा जिल्हादंडाधिकारी, ठाणे, महाराष्ट्र विदेशी मद्य (रोखीने विक्री, मद्यविक्री नोंदवही इ.) नियम, 1969 चे संबंधीत नियमान्वये प्रदान अधिकाराचा वापर करुन ठाणे जिल्ह्यातील खालील स्तंभ क्र.3 मधील नमूद हद्दीमधील सर्व मद्य विक्री करणाऱ्या अबकारी अनुज्ञप्त्या (एफएल-1, एफएल-2, एफएल-3, एफएल-4, एफएल-डब्ल्यू-4, नमुना-ई (बियर बार) फार्म ई-2. सीएल-2. सीएल-3, टीडी-1, एफएलबीआर-2 अनुज्ञप्ती इ.) खालील दिवशी बंद ठेवण्याचे याव्दारे आदेश देत आहे.

नियमभंग करणाऱ्यांवर कठोर कारवाई

आदेशात स्पष्ट नमूद केले आहे की, बंदीचे उल्लंघन करणाऱ्या परवाना धारकांवर महाराष्ट्र दारूबंदी अधिनियम 1949 व संबंधित नियमांनुसार कठोर कारवाई करण्यात येईल. तसेच परवाना रद्द होण्याची शक्यताही नाकारता येणार नाही. सर्व अधिकारी व परवानाधारकांनी आदेशाची नोंद घेणे बंधनकारक आहे.

जिल्हाधिकारी यांनी सांगितले की, निवडणूक काळात शांतता, सुव्यवस्था आणि मतदारांना कोणत्याही दबावाशिवाय मतदान करता यावे, याकरिता कायद्यानुसार ‘ड्राय डे’ लागू केला जातो. त्यामुळे नागरिकांनी आणि परवाना धारकांनी प्रशासनाला सहकार्य करण्याचे आवाहन करण्यात आले आहे.

0000000000