१९ जानेवारी रोजी महाराष्ट्र शिक्षक पात्रता परीक्षा

ठाणे दि. १६ जिमाका : महाराष्ट्र शिक्षक पात्रता परीक्षा २०१९ (MAHATET) रविवार दि. १९ जानेवारी २०२० रोजी होणार आहे. त्याचबरोबर पेपर १ साठी ७५९० व पेपर २ साठी ५६६५ असे एकूण १३२५५ परीक्षार्थींची परीक्षा घेण्यात येणार आहे. ठाणे जिल्ह्यातील महाराष्ट्र शिक्षक पात्रता परीक्षेकरीता एकूण ४० केंद्रांची निवड करण्यात आली आहे. परीक्षा पेपर १ सकाळ सत्र व पेपर २ दुपार सत्र अशा दोन सत्रात घेण्यात येणार आहे. परीक्षेकरिता ठाणे व कळवा शहरातील सकाळ सत्रासाठी २३ परीक्षा केंद्र व दुपार सत्रासाठी १७ परीक्षा केंद्रांची निवड करण्यात आली आहे. प्रत्येक केंद्रासाठी केंद्र संचालकाची नियुक्ती करण्यात आली आहे. तसेच ७ झोन आखण्यात आले असून पेपर १ साठी ४ झोन व पेपर २ साठी ३ झोन आखण्यात आले आहेत.  

  परीक्षा गृहात मोबाईल आणण्यास मनाई आहे. तसेच उशिरा येणाऱ्या विद्यार्थ्यांना प्रवेश नाकारण्यात येईल असे शिक्षणाधिकारी (प्राथमिक) तथा सदस्य सचिव जिल्हा परीक्षा आयोजन व संनियंत्रण समिती यांनी कळविले आहे.