स. वा. जोशी विद्यालयात विद्यार्थ्यांच्या सर्वंकष विकासासाठी ‘अमृत वर्ग’ प्रशिक्षणाचा शुभारंभ

 

 

ठाणे,दि.21(जिमाका) : ठाणे जिल्ह्यातील डोंबिवली येथील स. वा. जोशी विद्यालय व कनिष्ठ महाविद्यालयात विद्यार्थ्यांच्या सर्वंकष विकासाकरिता आणि योग्य मार्गदर्शनाकरिता ‘अमृत वर्ग’ प्रशिक्षणाचा नुकताच यशस्वी शुभारंभ करण्यात आला. या प्रशिक्षण सत्रासाठी अमृत संस्थेच्या वतीने श्री. राजेश पवार यांनी मार्गदर्शक म्हणून उपस्थित राहून विद्यार्थ्यांना मार्गदर्शन केले. या कार्यक्रमात विद्यालयातील सुमारे 250 ते 300 विद्यार्थी, शिक्षक व शिक्षकेतर कर्मचारी मोठ्या संख्येने सहभागी झाले होते. प्रशिक्षणादरम्यान उपस्थितांना अमृत वर्गाच्या विविध टप्प्यांची सविस्तर माहिती देऊन त्याचे दैनंदिन जीवनातील महत्त्व स्पष्ट करण्यात आले.

अमृत वर्गाचे स्वरूप आणि घटक अमृत वर्गाच्या माध्यमातून विद्यार्थ्यांचा शारीरिक, मानसिक व बौद्धिक विकास साधण्यासाठी विशेष संरचना तयार करण्यात आली आहे. यामध्ये प्रार्थना, शिथिलीकरण, बैठकीचे खेळ, आज्ञा अभ्यास, मैदानी खेळ, कृतीयुक्त गीते आणि राष्ट्रीय घोषणा या सात प्रमुख घटकांचा समावेश आहे. या सर्व घटकांच्या सरावातून विद्यार्थ्यांमध्ये एकाग्रता, शारीरिक सुदृढता आणि सांघिक भावना निर्माण होण्यास मदत होते, अशी माहिती या वेळी देण्यात आली.

गुणवत्ता विकास आणि राष्ट्रसेवेचा संकल्प अमृत वर्गाच्या आयोजनामुळे विद्यार्थ्यांमध्ये व्यक्तिमत्त्व विकास, राष्ट्रभक्ती, देशप्रेम, स्वयंशिस्त, नेतृत्वगुण आणि सामाजिक बांधिलकी यांसारख्या उच्च मूल्यांचे रोपण होण्यास मदत होणार आहे. या प्रशिक्षणातून मिळालेले ज्ञान आणि अनुभव विद्यार्थी आपल्या शाळेतील इतर सहकाऱ्यांपर्यंत पोहोचवतील, तसेच भविष्यात 30 ते 40 अमृत वर्ग स्वतः आयोजित करून राष्ट्र विकासाच्या कार्यात सक्रिय योगदान देतील, असा दृढ विश्वास विद्यालयाचे मुख्याध्यापक श्री. संजय नलावडे यांनी व्यक्त केला. तसेच हे प्रशिक्षण वर्ग विद्यालयात नियमितपणे पुढेही चालू ठेवण्याचे आश्वासन त्यांनी या प्रसंगी दिले.

उपस्थिती आणि संपर्काचे आवाहन सदर अमृत वर्ग प्रशिक्षण प्रसंगी अमृत संस्थेच्या ठाणे जिल्हा उपव्यवस्थापक सौ. माया रत्नपारखी-खेत्रे यांच्यासह शाळेतील शिक्षक आणि कर्मचारी वर्ग बहुसंख्येने उपस्थित होते. आगामी काळात हा स्तुत्य उपक्रम विविध शाळांमध्ये निरंतर राबवला जाणार आहे. या उपक्रमाबाबत अधिक माहिती मिळवण्यासाठी अथवा आपापल्या शाळांमध्ये ‘अमृत वर्ग’ आयोजित करण्यासाठी संपर्क क्रमांक ९११२२२६५३३ किंवा ८५९१०७२७४६ यांवर संपर्क साधावा, असे आवाहन प्रशासनाच्या वतीने करण्यात आले आहे.

0000000000